Thème : Contes, légendes et chansonsCommune(s) : BOHAIN-EN-VERMANDOISAuteur : HF Carpentier-transcrit par Marcel Lefevre
___________________
Bébert, il etoit chez sin camarad’
Qu’i li dit : Veux tu ? Nos irons à c’tir ?
I répond : J’ai peur èd del fusillad’
Çà ,’fait pon d’errien, nos allons partir.
Les v’là arrivés aud’bout dèl rue d’ Guise
Tout près dès l’estand, comm’ deux vrais tireurs
I fait bon ici ! Ah qué bonn’ tchiot’ bise
Hein ! qui dit Bébert, çà vos donn’ du cœur.
Pir’ qu’enn’ feul’ au veint, Bébert i trannoit.
I preind sin fusil quant’ c’étoit sin tour.
S’n ami i li dit : Tâche èd mirer droit ;
I feut mett’ deins c’noir ou bien tout autour.
I mir’ un momeint pi v’là c’ coeup qu’i part’ ;
Cell’ ball’ al ricoch’ ed vant d’arriver ;
Al fait dèl poussièr’ pi pad’sus cell’ cart’,
Al s’ein va en n’air, in l l’einteind chiffler.
Al fil’ cor pu lon qu’ès qu’min d’esboncourt ;
Al tomm’ su enn’ vaqu’ qu’al fait mett’ su l’ flanc ;
Çà l la fait miuler comm’ un viux tambour,
Bébert, mitant mort, étoit d’v’nu tout blanc.
Il a été vir’ çan qu’ c’est qu’al avoit ;
Il a vu un treu aussi rond qu’enn’ bagu’.
I n’ avooloit pon l’ croir’, i y a mis sin doigt
Qu’i r’gardoit tout l’ temps aveu s’n ergard vagu’.
Cell’ vaque èl leinn’main, al a trépassé.
Es gard’ i peinsoit arrêter Bébert
Mains, aveuc èd l’or, il l’a bien payée.
I s’a consolé ein s’ mettant au vert.
Deux, trois mois après, il étoit luron ;
I r’tourn’ à s’l’estand, peinsant rigoler.
Es ball’ al riff’ cor, al va deins s’ein carton
Qu’al arrach’ un d’ bout pi qu’i feut r’coller.
Ces marqueus i sort’t aveuc leu drapieu ;
N’ein v’là un qu’i gliche et pi qu’i s’étal’.
Ah ! qu’i fait Bébert, j’ai tué un marqueu,
Ej vois là bas s’ treu qu’al a fait cell’ ball‘ !
I y a eu si peur d’ sin coeup d’ maladress’,
Qu’i s’a mis à g’noux ein d’mandant pardon ;
Il a subit’meint tombé ein faibless’
Pi éternué…… deins sin patalon.
H.F. Carpentier, Rêveries d’un bohainois, transcription de Marcel Lefèvre